На 14-ти септември во Националната галерија– Чифте амам, ќе се одржи одбележувањето на јубилејот од 20 години на првото доделување на престижната награда ДЕНЕС за млади визуелни уметници до 35 години. Овој годишен јубилеј се одбележува со изложба на тројцата годинешни добитници на наградата, и тоа Ѓорѓи Десподов, Клелија Живковиќ и Бурџу Мусли.
Наградата ДЕНЕС се истакнува како важна платформа во земјава, обезбедувајќи две децении на младите уметници богат програм, вклучувајќи престој во Њујорк, уникатни образовни искуства во визуелната уметност, средби со интернационални жири-комисии и создавање на нови уметнички дела за изложбата на наградата. Оваа награда беше основана во 2002 година како иницијатива од Центарот за современи уметности – Скопје и Фондацијата за граѓанско општество од Њујорк, САД. Првпат беше доделена во 2003 година со цел да им обезбеди на младите уметници повеќе можности за развој на нивните уметнички интереси и презентација пред публиката, исто така за поддршка на дијалогот меѓу институциите и младите уметници. Од 2015 година, наградата ДЕНЕС се организира од страна на здружението Факултет за работи што не се учат – ФРУ, во рамки на фестивалот АКТО.
Целта на оваа награда е да го прикаже креативниот и уметнички потенцијал на младите уметници пред пошироката публика, истовремено создавајќи нови можност за нив и за институциите што ги поддржуваат. Наградата ДЕНЕС се издвојува како значаен фактор во развојот на културниот и институционалниот живот и како важен показател на уметничкиот контекст на младите талентирани креативни уметници.
Одбележувањето на 20-годишнината на наградата ДЕНЕС започна во април годинава со петдневна едукативно-дискурзивна програма за млади уметници „Совршениот уметник“ во НГРСМ – Мала станица. Во рамките на оваа програма, младите уметници имаа можност да развијат своите теориски и практични уметнички вештини и да ги испробаат во современата уметност.
Следеше изложбата „Прекаријатот има шанса: јавни простори во движење (кон)“ во Галеријата „Структура“ во Софија, каде 20 уметници, меѓу нив и добитници и учесници на наградата ДЕНЕС, ги претставија своите последни уметнички дела пред македонската и меѓународната публика.
Овогодишното одбележување на наградата ДЕНЕС ќе го достигне својот врв со изложба на тројцата добитници на наградата, документарна изложба за историјата на наградата и церемонија по повод јубилејот, која ќе биде придружена со музичка и дискурзивна програма. Ова е прилика за јавноста да се запознае со креативниот потенцијал на овие талентирани млади уметници и да се одвие важен дијалог за современата уметност и нивната улога во културниот развој.
Comments