Нови епизоди на blonded RADIO со нова Френк Оушн музика за 10 години од деби албумот

Френк Оушн издаде нова музика: едната 35 минутна „радио емисија“ околу микродозирање, а другата околу кинеската практика на лечење Чигонг: брак помеѓу Западните и Ориенталните - традиционални- пракси на заздравување.

Кога музичар со својот деби албум добива култен статус, со трескавична заљубеност и посветеност од своите фанови, статусот во музиката и културата е загарантиран како што тоа беше случај со Channel Orange на музичарот од Њу Орлеанс, Френк Оушн. Легендата гласи: го заборавил ранецот со лаптопот, на некоја забава во Лос Ангелес, и кога се вратил да го земе, добил шанса да биде слушнат. Жанрот во кој е сместен во тој период (на страна пар обиди за рапување) е R'n'B но талентот за пишување и интимноста која ја распалува, со текстовите, а тој оган го одржува со гласот, со бојата на гласот, начинот на кој го користи, е ретка комбинација, и евоцира чувство на заљубеност, и загуба на таа љубов често во исто време, па не е многу чудно што речиси сите што го слушнаа, останаа за него, да седат во таа состојба.

Од причини кои не ги знаеме до крај - од тогаш до сега, Оушн се повлече, и живее приватен но далеку од тоа дека е некреативен живот.

Сега нема да ја пишуваме неговата кратка биографија, но ќе ви кажеме дека на Apple Music има радио, radio BLONDED, и во секоја епизода, протнува понекоја нова трака.

Изданијата се спорадични и се случува да поминат и по пар години помеѓу две епизоди. И така на десетгодишнината на својот дебитантски албум добивме две епизоди “Blonded Lucy in the Sky With Diamonds.”

и “Blonded Energy!”

Првата е атмосферична, транс, па и амбиентална музика, која е обмотана околу гласот, разговорот со писателот и психолог др.Џејмс Фадиман. Разговорот е околу праксата на микродозирање и психоделици, нешто што е професионална окупација на добриот доктор.

Втората епизода содржи интервју со Мастер Мингтонг Гу, кој е специјализиран за кинеската практика на исцелување Чигонг.

Во моментот одат на Apple Music 1 што значи дека треба да се „уловат“ во живо, барем за слушателите во Македонија, но ги најдовме симнати на Јутјуб. Засега ја ислушавме само првата епизода до половина, за да можеме да дадеме оглед, но ете, послушајте ги сами - па ќе зборуваме:)