Велес ги отвора вратите за таленти од целиот свет: Објавен меѓународен конкурс за стрип

Стрип центарот на Македонија, со седиште во Велес кој полека но сигурно си го враќа духот на кул, културен, прогресивен град - го објави почетокот на традиционалниот Меѓународен Конкурс за Стрип, кој претставува дел од активностите на 21-от Меѓународен стрип салон "Велес 2024". Овој настан е еден од најзначајните стрип манифестации во државата и е финансиран од Министерството за култура на Република Северна Македонија и Општина Велес.

Пропозиции и услови за учесниците

Според пропозициите, должината на стрипот треба да биде од 1 до 6 табли во А4 формат со минимална резолуција од 300 dpi, ако се испраќа по електронски пат. Доколку стрипот е на една страна, треба да содржи најмалку 5 сликички. Тема на стрипот е слободна, а секој автор може да учествува со само еден стрип освен сценаристите, кои може да направат сценарија за повеќе стрипови.

Повеќе автори може да соработуваат на еден стрип, при што треба да се наведе кој што направил: сценарио, молив или туш. Заедно со стрипот, авторите треба да испратат лична биографија која вклучува име и презиме со фотографија, датум на раѓање, адреса, држава, е-маил и година кога е стрипот нацртан. Сите стрипови треба да бидат јасно обележани со имињата на авторите и називот на стрипот.

Награди и признанија

Пристигнатите стрипови ќе бидат разгледани од тричлена комисија која ќе ги предложи следните награди:

- Прва награда: 300 ЕУР, "Златен стрип", изданија и диплома за прво место.

- Втора награда: "Сребрен стрип" и диплома за второ место.

- Трета награда: "Бронзен стрип" и диплома за трето место.

- Награда за најдобро сценарио: диплома.

- Награда за најдобар млад автор до 18 години: диплома.

- Други специјални награди.

Сите пристигнати стрипови ќе бидат изложени на изложбата на Стрип Салон Велес 2024 и ќе имаат реална можност за друг вид на промоција.

Праќање на стриповите

Стрипаџиите можат да ги испратат своите стрипови до 1-ви август 2024 година на:

- Адреса: Стрип Центар на Македонија – Велес (за конкурсот), Ул. Васил Ѓоргов, бр.78, 1400 Велес, Република Северна Македонија (пожелно преку Eco Logistic).

- Мејл: stripkonkurs@gmail.com

За повеќе информации, заинтересираните можат да се јават на горенаведениот е-маил или на телефонскиот број +38978867327.

Со овој конкурс, Велес ја зацврстува својата позиција како културен епицентар за стрип уметноста во Македонија и го поттикнува учеството на таленти од целиот свет, создавајќи плодна средина за размена на идеи и креативност.