ЛЕНИ ГЕЛЕВА: На големо задоволство на сите брзи и диви кучки, следната гостинка на „Брза кучка“ поткастот, ќе биде Лени Гелева, уметница, женски фотограф, танцувач, камерманка, филмофилка, дипломиран филолог (германски јазик и литература), заљубеник во се́ што подразбира уметноста без која нејзиниот живот (или било чиј) нема ниту смисла ниту значај. Доколку ја изгуглате ќе најдете стотици па можеби и илјадници статии во нејзината 15 годишна фотографска кариера (првата групна изложба „Душата на градот“ е во 2007-ма, а првата самостојна во 2010-та, насловена „Светот во моите очи“) но ретко кој ја викнал да разговара со нејзе, да ја чуе и непосредно. Во таа смисла, „Брза кучка“ разговорот со Лени е исклучително важен, не само за нас, туку и за - без претерување - македонската култура, но и од феминистички аспект, како женски глас, кој е толку присутен, со опсервации кои се толку проникливи и ја наоѓаат духовитоста во апсурдноста на секојдневието, но без да го исмејува или омаловажува. Разговорот на поткастот ќе биде разговор кој настанува ако не со децении во една своја форма (како дуо - Endeneu - кога си го подававме фото-апаратот во креативна игра), тогаш сигурно барем година-дена, кога разговаравме да направиме интервју, по предлог на Никола Гелевски, за „Окно“, откако Лени ја отвори својата 12-та изложба Панта Реи во КСП Центар Јадро.